| Summary: | Verkefnið er opið nemendum og starfsfólki Háskólans á Akureyri Ritgerðin sem hér um ræðir er lokaverkefni til B.Ed. prófs við Kennaradeild Háskólans á Akureyri. Í henni er fjallað um lystarstol, sem er vaxandi heildbrigðisvandamál í nútíma samfélagi. Rannsóknarspurningarnar sem leitast er við að svara eru: 1) „Eru grunnskólakennarar meðvitaðir um að lystarstol sé sjúkdómur sem hrjáð getur börn á grunnskólaaldri? “ 2) „Er það hlutverk skólanna að bregðast við ef upp kemur tilfelli um lystarstol? “ 3) „Telja grunnskólakennarar að áætlanir þurfi að vera til innan skólanna í slíkum tilfellum og eru þær til?“ Í fyrri hluta ritgerðarinnar er lystarstol skilgreint og varpa höfundar ljósi á margþætt einkenni sjúkdómsins. Sjúkdómurinn er af geðrænum toga og er samsettur úr andlegum, líkamlegum og félagslegum þáttum. Í fyrri hluta ritgerðarinnar eru helstu orsakir og afleiðingar sjúkdómsins einnig dregnar fram í dagsljósið, fjallað er um ýmsa þætti sem geta haft áhrif á ungt og óharðnað fólk nú á dögum og stiklað á stóru varðandi forvarnir gegn sjúkdómnum, meðferðaúrræði og batahorfur. Í síðari hluta ritgerðarinnar fjalla höfundar um könnun sem þeir gerðu á meðal grunnskólakennara á Akureyri. Þar var leitast við að fá svör kennara við spurningum á borð við: Telur þú að grunnskólanemar eigi við lystarstol að stríða? Þekkir þú til einhverra einkenna lystarstols sem kennarar og aðstandendur þurfa að vera vakandi fyrir? Telur þú það hlutverk skólans að bregðast við vakni grunur um að nemandi sé með lystarstol? Einnig var reynt að komast að því hvort skólarnir hefðu áætlanir sem hægt væri að grípa til ef lystarstolstilfelli kæmi upp og hvort kennarar teldu þörf á slíkum áætlunum. Könnunin fór fram í öllum grunnskólum Akureyrar og tóku 27 kennarar þátt. Í ljós kom að flestir kennarar eru meðvitaðir um það að lystarstol sé sjúkdómur sem hrjáð geti grunnskólabörn og að það sé hlutverk skólans að bregðast við leiki grunur á að nemandi sé haldinn lystarstoli.
|
|---|