| Summary: | Úrræðaleysi í grunnskólum landsins er oft til umræðu innan samfélagsins. Samkvæmt nýjum farsældarlögum og menntastefnu 2030 á þjónusta við börn að vera skipulögð, stig- og þrepaskipt, samfelld og búa hverju barni þroskavænleg uppeldis- og námsskilyrði. Snemmtækur stuðningur er í forgrunni og lögð er áhersla á gagnreyndar aðferðir og þverfaglega samvinnu innan grunnskóla landsins til þess að auka gæði inngildandi menntunar. Í þessu verkefni var leitast við að varpa ljósi á stuðning sem grunnskólabörn í Hafnarfirði fá og hvort þjónustan standist kröfur laga og samfélags. Einnig var skoðaður stuðningur og ráðgjöf sem skólarnir fá frá skólaskrifstofu Hafnarfjarðar. Blönduðum rannsóknaraðferðum (eigindlegum og megindlegum) var beitt við gagnaöflun þar sem tekin voru sex viðtöl við skólastjórnendur fimm stærstu grunnskóla Hafnarfjarðar og sendur rafrænn spurningalisti á alla stjórnendur sömu grunnskóla. Niðurstöður sýndu að 67% þátttakenda töldu að námstengd úrræði á fyrsta þrepi dygðu til þess að meirihluti nemenda nái tökum á þeirri færni sem kennd er, 61% töldu sama eiga við um úrræði tengd hegðun, 61% um félagsfærni úrræði og 50% um úrræði tengd tilfinningafærni. Mat stjórnenda á áhrifum úrræðanna á öðru og þriðja þrepi minnkaði í flestum þáttum. Stjórnendur töldu ekki upp mörg gagnreynd úrræði innan skólanna og kölluðu eftir aukinni fagþekkingu og fleiri leiðum til að mæta þörfum barna. Ráðgjöf á vegum skólaskrifstofu vegna náms, hegðunar, félagsfærni og líðanar þótti skólastjórnendum ekki skila tilætluðum árangri en spurt var hvort ráðgjöfin væri skjót, aðgengileg, gagnleg/hjálpleg og mætti þörfum skólans. Aftur á móti voru stjórnendur ánægðir með verklag innan Hafnarfjarðar sem kallast Brúin og voru 77% sammála því að það væri framför miðað við fyrra verklag. Flestum stjórnendum fannst Brúin stuðla að aðgengilegri þjónustu (72%), leiða til árangursríks stuðnings (78%) og mæta þörfum skólans/starfsfólks/nemenda (72%). Niðurstöður benda til þess að grunnskólar Hafnarfjarðar vinni metnaðarfullt starf við að mæta ...
|
|---|