| Summary: | Í þessari ritgerð, sem er lokaverkefnið mitt til B.Ed gráðu, mun ég fjalla um samvinnu á milli myndlistarskóla og grunnskóla. Í því samhengi mun ég skoða Billedskolen i Tvillingehallen og Myndlistarskólann í Reykjavík. Það sem vakti áhuga minn á að kynna mér Billedskolen var samstarf hans við grunnskólana á Kaupmannahafnarsvæðinu. Eftirtektarvert þótti mér að þar eru fengnir fagmenn, t.d. arkitektar og auglýsingahönnuðir, til að vera gestakennarar í tengslum við það viðfangsefni sem unnið er með hverju sinni. Það er mikið lagt upp úr því að kalla til sérfræðinga og til að mynda eru allir kennarar Billedskolen starfandi myndlistarmenn. Þegar ég fór að afla mér heimilda um þá myndlistarskóla, sem eru starfræktir á Íslandi, komst ég að því að Myndlistarskólinn í Reykjavík hlaut styrk úr Þróunarsjóði menntaráðs Reykjavíkurborgar árið 2004 til að koma á samstarfi grunnskóla og myndlistarskóla líkt og Billedskolen í Tvillingehallen hefur gert undanfarin ár. Því fannst mér áhugavert að skoða þessa tvo myndlistarskóla og bera þá saman, samstarf þeirra við grunnskóla og kynna mér þá hugmyndafræði sem liggur á bak við starf þeirra. Ég vil þakka Ásdísi Sigurðþórsdóttir frænku minni fyrir aðstoðina og leiðsagnarkennara mínum Svölu Jónsdóttur fyrir góða leiðsögn.
|
|---|