| Summary: | Meginviðfangsefni ritgerðarinnar er að rannsaka helstu áhrifaþætti er ráða íbúðaverði, einkum með tilliti til staðsetningar. Í fyrri hluta ritgerðarinnar er farið yfir lögmál fasteignamarkaðarins og hvernig hann tengist leigumarkaðnum. Farið er nákvæmlega í hvernig hlutar fasteigna- og leigumarkaðarins hafa áhrif hver á annan og í hvaða röð. Samhliða útskýringum á mörkuðunum eru hlutirnir settir í samhengi við nýlegar sviptingar á íslenska og bandaríska markaðnum. Í seinni hlutanum eru nokkrir hlutir teknir sérstaklega fyrir sem hafa áhrif á hlutfallslegar verðbreytingar á húsnæði milli hverfa og þar með einnig á borgarmyndun. Þar ber hæst breytingar á vöxtum eða fjármagnskostnaði, aðgengi að fjármagni, mengun og umferðarþunga, fjárfestingar spákaupmanna í húsnæði og fleira. Aðaláherslan í ritgerðinni er lögð á þætti sem snúa að áhrifum vaxtabreytinga á hlutfallslegt íbúðaverð milli hverfa og tegund húsnæðis. Fyrst er neikvæð fylgni vaxta og hlutfallslegs verðs á fjölbýli og einbýli í Reykjavík skoðuð og því næst hlutfallslegar verðbreytingar á fjölbýli í miðbæ Reykjavíkur og Vangi í Hafnarfirði. Eftir að raunverulegar tölur höfðu verið notaðar og neikvætt samband komið í ljós var samskonar rannsókn framkvæmd fyrir miðbæ Reykjavíkur og Hraunbæ og að lokum hlutfallslegar verðbreytingar á íbúðum á Manhattan og í Queens. Í næsta kafla eru áhrifin af fjárfestingu í húsnæði á íbúðaverð skoðuð og að lokum neikvæð ytri áhrif og mismunandi áhrif þeirra eftir staðsetningu. Það verður gert með aðstoð Bid-rent og von Thünen líkananna.
|
|---|