Summary: | Markmið með þessari ritgerð er að rannsaka Austurland sem áfangastað fyrir erlenda ferðamenn og samsvörun erlendra ferðamanna við markhópa Íslandsstofu og Austurbrúar. Lagðar voru fram þrjár rannsóknarspurningar og ein tilgáta: 1. Hver er vitund erlendra ferðamanna á Austurlandi sem áfangastaðar? 2. Hver er ímynd Austurlands sem áfangastaðar í augum erlendra ferðamanna? 3. Geta erlendir ferðamenn samsvarað sig við lýsingar markhópa Íslandsstofu og Austurbrúar? Tilgáta: Þeir sem yfirgefa landið hafa meiri vitund um Austurland en þeir sem nýkomnir eru. Notast var við megindlega aðferðafræði og var spurningalista dreift á meðal þátttakenda yfir tvo daga í rútum Grayline frá Reykjavík til Keflavíkurflugvallar og til baka. Fjöldi svarenda var 290 einstaklingar, þar af voru 62,41% konur og 37,59% karlar. Jöfn dreifing var á aldri svarenda en flestir voru á aldursbilinu 18-35 ára eða 46,21%. Svarendur komu frá 31 landi en langflestir komu frá Bretlandi og síðan Bandaríkjunum og Kína. Vitund úrtaksins á svæðinu var töluverð en 52,4% höfðu heyrt af Austurlandi, þar af hafði stærsti hluti heyrt af svæðinu frá vinum og ættingjum. Framkvæmt var kíkvaðrað tölfræðipróf til þess að kanna gildi tilgátunnar. Í ljós kom að ekki voru tengsl milli þeirra sem voru að yfirgefa landið og þeirra sem voru að mæta varðandi vitund um Austurland (p >0,05). Þeir ímyndarþættir sem svarendur tengdu sterkast við hvað viðkom Austurlandi voru friðsamt, norðurljós, fjöll, einangrað og gönguferðir. Að sama skapi komu orðin kalt, norðurljós og afskekkt fyrst upp í huga svarenda. Samsvörun svarenda við þá fimm markhópa sem greindir höfðu verið af Íslandsstofu og Austurbrú var mjög mikil en einungis 4,1% þeirra fannst engin lýsing eiga við sig.
|