| Summary: | Tilgangur rannsóknarinnar var að kanna viðhorf og upplifun stjórnarfólks til kynjakvóta í stjórnum fyrirtækja á Akureyri. Rannsókninni var ætlað að auka þekkingu á því hver áhrif kynjakvóta á stjórnir fyrirtækja eru á stöðum utan höfuðborgarsvæðisins. Blandað rannsóknarsnið var nýtt til þess að ná fram viðeigandi niðurstöðum. Við samanburð var notast við fyrirliggjandi rannsóknir og tölfræðileg gögn frá Hagstofu Íslands og Creditinfo. Framkvæmd var spurningakönnun meðal 56 framkvæmdastjóra og stjórnarfólks á Akureyri og tekin átta hálf-stöðluð djúpviðtöl við stjórnarfólk þar. Niðurstöður rannsóknarinnar voru mjög í samræmi við fyrri rannsóknir. Þær sýna að viðhorf stjórnarfólks til kynjakvótans er almennt jákvætt. Neikvæðni sem var til staðar í upphafi hefur mildast. Viðhorf karla til þess að binda kynjakvóta í lög er mun neikvæðara en kvenna, en um helmingur kvenna telja það vera of harkalega aðgerð. Upplifun kvenna er að ekki sé nægilegur fjöldi kvenna í ábyrgðarstöðum og það geti af sér neikvæða staðalímynd. Viðhorf allra sem tóku afstöðu er að konur séu jafnhæfar körlum til að gegna ábyrgðarstöðum. Meirihluti viðmælenda taldi að stjórnarkonur séu það klárar og hæfar að þær hefðu án lagasetningar verið valdar til stjórnarsetu. Sumar konur upplifa vegna kynjakvótans að það dragi úr verðleikum þeirra að hafa tekið sæti í stjórn. Verkferlar og stjórnarhættir eru formlegri og ákvörðunarvaldið hefur færst inn í fundarherbergið þar sem það á að vera. Árin fyrir lagasetningu kynjakvótans höfðu þau fyrirtæki sem lögin ná yfir aukið lítillega hlutfall kvenna í stjórnum. Síðan þá hefur þetta breyst verulega til batnaðar. Það hefur veitt konum möguleika til að afla sér stjórnarreynslu en hún ræður miklu um val kvenna í stjórn. Það er mikilvægt að viðhalda jákvæðri umræðu um hlutfall kynja í stjórnum fyrirtækja í samfélaginu og ná því markmiði að konur og karlar standi jafnfætis við val í stjórnir. Lykilorð: Kynjakvóti, stjórnir, kynjajafnrétti, Akureyri, blandað rannsóknarsnið. This research seeks to better understand ...
|
|---|