| Summary: | Verkefnið er lokað til 1.6.2017. Bakgrunnur: Þunglyndi veldur þjáningum og skerðir lífsgæði. Á Sjúkrahúsi Akureyrar (SAk) er rekin legudeild fyrir sjúklinga með alvarlegar geðraskanir, þar með talið þunglyndi. Meðferðarmarkmið eru að bæta líðan, efla sjálfshjálp og bæta lífsgæði. Þunglyndi hefur áhrif á fjölskyldur hinna veiku en fjölskyldustuðningur bíður innleiðingar á deildinni. Markmið: Að rannsaka breytingar á þunglyndi, kvíða, streitu og heilsutengdum lífsgæðum vegna innlagnar við alvarlegu þunglyndi á geðdeild SAk og hvort kvíðastig við innlögn, kyn, eða tími frá sjúkdómsgreiningu hefði áhrif þar á. Einnig að kanna hvort og þá hve mikið fjölskyldustuðnings gætti í meðferðinni. Aðferð: Lýsandi rannsókn með mælingum við innlögn og útskrift. Þunglyndi, kvíði og streita voru mæld með DASS (Depression Anxiety Stress Scale) og heilsutengd lífsgæði með HL-prófinu (íslenskum lífsgæðakvarða) við innlögn og útskrift, en fjölskyldustuðningur var eingöngu mældur við útskrift, með ICE-FPSQ-kvarðanum (Stuðningur og fræðsla við fjölskyldur). Úrtakið var allir sem lögðust inn á deildina vegna þunglyndis á 12 mánaða tímabili. Niðurstöður: Þátttakendur voru 65 (42 konur) af 73 mögulegum (89% svörun), meðalaldur 36,25 (±15,32). Þunglyndi minnkaði um 18,8 (±11,22) stig, kvíði um 10,57 (± 8,81) stig og streita um 14,54 (±9,62) stig, en heilsutengd lífsgæði hækkuðu um 14,4 (± 10,32), p < 0,001 fyrir allar breytingar. Mjög alvarlegur kvíði við innlögn lengdi dvölina um 4,62 (± 1,7) daga (p = 0,025). Bati var hvorki háður kyni né tíma frá sjúkdómsgreiningu, en konur höfðu meiri kvíða og streitu við innlögn en karlar (p < 0,01) og heilsutengd lífsgæði karla mældust lægri en kvenna bæði við innlögn og útskrift (p < 0,01). Fjölskyldustuðningur mældist 39,92 (±14,56) stig, af 70 mögulegum. Ályktanir: Líðan og lífsgæði sjúklinga með alvarlegt þunglyndi mælast marktækt betri við útskrift en innlögn á geðdeild SAk. Mælingar sýna mjög alvarleg veikindi við innlögn og heilsutengd lífsgæði sjúklinganna eru verulega skert, ...
|
|---|