| Summary: | Markmið rannsóknarinnar var að varpa ljósi á upplifun og reynslu umsjónarkennara í Grunnskóla Snæfellsbæjar af innleiðingu náms-greinarinnar átthagafræði í skólanámskrá skólans og framkvæmd hennar. Grunnskóli Snæfellsbæjar er skóli sem varð til við sameiningu þriggja grunnskóla: Grunnskólans á Hellissandi, Grunnskólans í Ólafsvík og Lýsuhólsskóla. Áfram er kennt á öllum stöðunum en að hluta til með öðrum formerkjum en áður. Níu umsjónarkennarar tóku þátt í rannsókninni og störfuðu þeir á öllum þremur starfsstöðvum skólans. Rannsóknin er eigindleg tilviksrannsókn og byggist á rýnihópaviðtali, hálf-formgerðum viðtölum við níu umsjónarkennara skólans og greiningu skriflegra gagna. Rannsóknin hófst á vorönn 2012 og lauk á vorönn 2013 og voru eigindlegar rannsóknaraðferðir notaðar við öflun gagna og úrvinnslu þeirra. Í niðurstöðum rannsóknarinnar kemur fram að kennarar fundu fyrir óöryggi í fyrstu á meðan innleiðingin stóð yfir. Þeir vissu sumir ekki alveg til hvers var ætlast af þeim, hvar þeir gætu leitað fanga, hvernig þeir ættu að nálgast viðfangsefnið og hvernig hægt væri að samþætta námsgreinina öðrum námsgreinum. Á öðru ári var strax auðveldara fyrir kennarana að útfæra námsefnið því þeir höfðu komið sér upp gagnabanka þar sem ríktu óskráð lög um að allir ættu að leggja sitt efni inn og að sama skapi gætu þeir líka tekið út efni og nýtt sér þegar þeim hentaði. Þetta var banki sem skilaði mjög hagstæðum vöxtum. Oft unnu kennarar saman við verkefnagerðina og fengu jafnvel utanaðkomandi einstaklinga, sem þekktu vel til umfjöllunarefnisins, til þess að koma inn í skólann og vera með fræðslu fyrir nemendur. Rannsóknin leiddi í ljós að kennarar voru almennt hlynntir innleiðingu námsgreinarinnar og viðhorf þeirra til átthagafræðinnar var jákvætt þrátt fyrir að þetta hafi aukið fyrirhöfn þeirra við undirbúning vegna kennslunnar. Þeim var öllum umhugað um að viðhalda átthagafræðinni í skólanámskránni. Af niðurstöðunum má draga þá ályktun að þetta ferli hafi orðið til þess að auka samkennd kennaranna og auka metnað ...
|
|---|