| Summary: | Þessi ritgerð greinir nýlega íslenska hinsegin sögu með áherslu á árin 1990–2010. Á þessu tímabili færðust íslenskir hommar og lesbíur frá því að vera utangarðs utan þjóðarímyndarinnar og tóku sér stöðu innan hennar. Löggjöf um staðfesta samvist milli samkynja para tók gildi árið 1996, vernd gegn mismunun og rétturinn til ættleiðinga fylgdi á hæla hennar, en jafnrétti til hjónabands náðist árið 2010 undir ríkisstjórn fyrsta samkynhneigða forsætisráðherra heims. Þessi saga er orðin hluti af sjálfsmynd Íslendinga sem sjá þjóðina sem „hinsegin útópíu“ eða „hinsegin paradís“: hún er merki um einstakt umburðarlyndi, fjölbreytileika og framfarir þjóðarinnar. Þessi ritgerð gagnrýnir þessa viðteknu frásögn í gegnum kenningar Benedicts Anderson um þjóðir og þjóðernishyggju, kenningar Michel Foucault um kynverund og nýfrjálshyggju, kenningar Lisu Duggan um samkynhneigð viðmið, kenningar Jasbir Puar um samkynhneigða þjóðernishyggju og kenningar Söru Ahmed um hrif. Með sifjafræðilegri greiningu og orðræðugreiningu á opinberum heimildum—greinum í dagblöðum og tímaritum, opinberum skýrslum, predikunum, þingræðum, heimildamyndum, viðtölum—birtist önnur sýn á nýlega íslenska hinsegin sögu þar sem hinsegin fólk endurstaðsetur sig gagnvart risi stjórnvaldstækni nýfrjálshyggjunnar á Íslandi á 10. áratugnum. Sumir urðu hluti af hinu endurímyndaða samfélagi þjóðarinnar sem hafði umfaðmað samkynhneigð viðmið og samkynhneigða þjóðernishyggju en aðrir—sérstaklega trans, tvíkynhneigt og kynsegin fólk—hurfu sjónum. Þessi ritgerð setur fram röksemdafærslu sína með fjórum greinum. Sú fyrsta rannsakar sameiginlegu minninguna um sögu réttindabaráttu homma og lesbía sem tók að mótast upp úr aldamótum. Þessi minning sléttir út allt sem gæti flækt línulegu framfarafrásögnina af innlimun homma og lesbía inn í þjóðina. Útilokanir á öðrum hinsegin hópum falla utan minningarinnar og virkt hlutverk ríkisins í því að ná þessum innlimunum og útilokunum fram er gleymt og grafið. Sögulegu samhengi aðlagana að nýfrjálshyggju er haldið utan sviðs og ...
|
|---|