Infinitiiva davvisámegiela syntávssas minimalismma teoriija vuođul

• Main Author: Partapuoli, Marja K.
• Format: Master Thesis
• Language: Sami languages
• Published: Universitetet i Tromsø 2013
• Subjects: VDP::Humaniora: 000::Språkvitenskapelige fag: 010::Samisk språk: 031; VDP::Humanities: 000::Linguistics: 010::Sami language: 031; Infinitiivvat; Modálavearbbat; Davvisámegiella; samisk; SAM-3900; Magga; Sammallahti; sami
• Online Access: https://hdl.handle.net/10037/5364

Dán čállosis geahčan movt infinitiiva doaibmá davvisámegiel syntávssas. Čilgen infinitiivvaid minimalismma teoriijja vuođul. Go lean minimalismma teoriija geahččan, de lea mu váldogáldun leamašan Adger (2004) Core syntax. A mimimalist approach. Geahčan dušše daid osiid minimalismma teoriijas, main lea mearkkašupmi mu bargui. Geahčan álggus infinitiivvaid mat leat modálavearbbaide komplemeantan, ja čilgen maiddái earuhusa veahke- ja váldovearbbaid gaskkas. De geahčan infinitiivvaid mat leat konstruerejuvvon visses vearbbaiguin. Dán oasis čilgen maiddái argumeantastruktuvrra ja PRO. Geahččan maiddái movt Adger (2004) gieđahallá ECM-cealkagiid, dákkár cealkagat main lea oinnolaš subjeakta, muhto vearba infinitiivva hámis. Geahččan maiddái maid Adger čállá vearbbaid birra mat váldet infinitiivva komplemeantan ja mat vearbbat dat leat. Viidásut geahčan movt infinitiivvat ovdal leat gieđahallon davvisámegielas ja movt earret eará Nielsen (1979), Magga (1982 ja 1986), Nickel (1994), Sammallahti (2005), Jomppanen (2006) ja Svonni (2011) leat čilgen infinitiivaráhkadusaid. Sii eai leat čuvvon minimalismma teoriija, muhto lea liikká miellagiddevaš geahččat movt sii leat gieđahallan infinitiivvaid. Loahpalaččat mon čájehan ovdamearkkaid mu materiálas. Mu materiála lea vižžon Ávvir-áviisain vahku 36, 2011 (Ávvir, 2011. Nr. 167-171). Mon lean dušše geahččan daid cealkagiid gos infinitiiva oidno, ja buot cealkagat leat vižžon artihkkaliin. Geahčan maŋemussii movt mu materiála heive minimalismma teoriijii.