Tréhúsin í steinsteypufrumskóginum : viðlagasjóðshúsin í Keilufelli

• Main Author: Katrín Dögg Óðinsdóttir Kaewmee 1993-
• Other Authors: Listaháskóli Íslands
• Format: Bachelor Thesis
• Language: Icelandic
• Published: 2022
• Subjects: Arkitektúr; Byggingarlist; Timburhús; Húsakynni; Heimaeyjargosið; Heimaey; Hús
• Online Access: http://hdl.handle.net/1946/45238

Heimaeyjargosið árið 1973 situr fast í minni margra Íslendinga og hafði víðtæk áhrif á þjóð og land til frambúðar. Um miðja nótt þann 23. janúar hófst óvænt eldgos á Heimaey og var þar með hafið fyrsta eldgosið í þéttbýli á Íslandi. Á augabragði þurftu yfir 5000 manns að flýja heimili sín og þegar upp á land var komið blöstu við miklar húsnæðisáskoranir. Mikilvægt var að leysa húsnæðisvanda flóttafólksins, skjótt og vel. Í kjölfar hamfaranna var stofnaður Viðlagasjóður. Eitt helsta hlutverk Viðlagasjóðs var að tryggja húsnæði fyrir Eyjamenn sem ættu ekki afturkvæmt. Sú leið sem var farin var að kaupa og flytja til landsins rúmlega 550 einingahús frá Norðurlöndunum sem voru reist víðsvegar um landið. Í þessari ritgerð verður horft til timburhúsaþyrpingarinnar í Keilufellinu, Efra-Breiðholti. Húsin voru flutt inn frá Svíþjóð. Þau eru 40 talsins, einföld og hagkvæm í byggingu flutt hingað til lands í stórum flekum og sett saman hér. Keilufellshúsin voru ætluð fyrir meðalstóra fjölskyldu á þess tíma mælikvarða og voru skynsamlega skipulögð og hver fermetri vel nýttur. Í hálfa öld hafa Keilufellshúsin verið eftirsótt heimili og staldra stutt við á sölu. Hús sem fyrst voru hugsuð til bráðabirgða vegna hamfaranna en urðu varanleg heimili og eru það enn. Markmið ritgerðarinnar er að kanna gæði húsanna í Keilufelli. Stuðst var við skriflegar heimildir, eigin athuganir og viðtöl. Viðtölin bættu við upplýsingum og óvæntri þekkingu sem ekki var að finna í skráðum texta um húsin. Leitast var sérstaklega eftir því að finna sameiginlegar upplifanir og skoðanir þeirra sem hafa kallað Keilufellið sitt heimili.