| Summary: | Rannsókn þessi er verkefni til meistaraprófs við menntavísindasvið Háskóla Íslands. Verkefnið varðar konur sem fluttu af landsbyggðinni til höfuðborgarsvæðisins á árunum 2003-2007. Kannað var hvaða ástæður liggja til grundvallar ákvörðun um búferlaflutning og sjónum beint sérstaklega að því hvort fábreyttur vinnumarkaður sé meginástæðan fyrir búferlaflutningum kvenna. Sérstaklega var kannað hvort vísbendingar fyndust um að langskólagengnar konur flyttust frekar en konur með stutta skólagöngu. Einnig var sjónum beint að aðgerðum stjórnvalda til að styrkja byggð, aðkomu kvenna að þeim hvort og þá í hve miklum mæli þær aðgerðir hafa tekið mið af óskum og þörfum kvenna. Gagna var aflað með spurningalistum og var svara leitað með símtölum auk þess sem opinber gögn voru skoðuð til að kanna stefnumótun, vinnuaðferðir stjórnvalda og hlut kvenna í umræðunni. Niðurstöður sýna að helstu ástæður fyrir búferlaflutningum 20–39 ára kvenna af landsbyggðinni til höfuðborgarsvæðisins eru nám, fábreyttur vinnumarkaður á landsbyggðinni og betri launakjör á höfuðborgarsvæðinu. Stefnumótun, umræða og ákvarðanataka um byggðaþróun er nær eingöngu í höndum karla. Lykilorð: Stefnumótun, landsbyggð, atgervistap, kynjahlutfall, flutningsjöfnuður.
|
|---|