Erfðabreytt matvæli. Hvað finnst íslenskum almenningi?

• Main Author: Sonja Huld Guðjónsdóttir 1987-
• Other Authors: Háskóli Íslands
• Format: Thesis
• Language: Icelandic
• Published: 2014
• Subjects: Viðskiptafræði; Erfðabreytt matvæli; Viðhorfskannanir; Iceland
• Online Access: http://hdl.handle.net/1946/19789

Erfðabreytt matvælaframleiðsla er umdeild út um allan heim. Andstæðingar hennar hafa áhyggjur af líffræðilegum fjölbreytileika ásamt fleiri þáttum en fylgjendur sjá tækifæri til framtíðar með öflugri ræktun og betri nýtingu lands. Viðhorf neytenda til erfðabreyttra matvæla spáir að miklu leyti fyrir um kaupáform neytenda og ýmsar breytur hafa verið nefndar sem áhrif hafa á viðhorf neytenda. Viðfangsefni rannsóknarinnar var að komast að viðhorfi Íslendinga til erfðabreyttra matvæla, ásamt því að skoða hvernig þær breytur, sem oft hefur verið fjallað um í fræðilegu yfirliti, hafa áhrif á þetta viðhorf. Rannsóknin var aðallega byggð á megindlegri aðferðafræði, þar sem þátttakendur voru fengnir til að svara spurningalista, sem innihéldu spurningar er varða viðhorfið og einnig grunnþekkingu í erfðafræði. Tekið var mið af viðhorfi til tækni og vísinda, trausti til viðeigandi stofnanna og vísindamanna, skynjuðum ávinningi og áhættu í tengslum við framleiðsluna, ásamt viðhorfi til erfðabreyttra matvæla og kaupáformum neytenda. Helstu niðurstöður rannsóknarinnar benda til þess að viðhorf hér á landi sé fremur jákvætt og nær því viðhorfi sem þekkist í Bandaríkjunum heldur en víðast hvar í Evrópu. Karlmenn og yngri aldurshópar eru jákvæðari í garð erfðabreyttra matvæla sem er í takt við fyrri rannsóknir. Menntun og þekking skipta einnig máli þegar kemur að viðhorfinu en því hærri menntun og meiri þekking sem þátttakendur búa yfir, því mun jákvæðara viðhorf sýna þeir til erfðabreyttra matvæla.