Viðhorf og þekking kvenna á barneignaraldri til offitu og hreyfingar á meðgöngu : rannsóknaráætlun

• Main Authors: Aníta Rut Guðjónsdóttir 1988-, Heiða Berglind Magnúsdóttir 1989-, Heiður Sif Heiðarsdóttir 1987-, Sonja Gísladóttir 1985-
• Other Authors: Háskólinn á Akureyri
• Format: Thesis
• Language: Icelandic
• Published: 2013
• Subjects: Hjúkrunarfræði; Meðganga; Offita; Hreyfing (heilsurækt); Akureyri; Kvenna; Enga
• Online Access: http://hdl.handle.net/1946/15247

Verkefnið er lokað til 1.1.2023. Þessi rannsóknaráætlun er lokaverkefni til B.S. gráðu í hjúkrunarfræði við Háskólann á Akureyri. Tilgangur rannsóknarinnar er að kanna viðhorf og þekkingu íslenskra kvenna á barneignaraldri til offitu og hreyfingar á meðgöngu. Rannsóknarspurningin er: Hvert er viðhorf og þekking íslenskra kvenna á barneignaraldri til offitu og hreyfingar á meðgöngu? Rannsóknin byggir á eigindlegri rannsóknaraðferð og stuðst verður við Vancouver-skóla aðferðina í fyrirbærafræði. Tilgangsúrtak verður fengið úr fæðingar- og mæðraskrám Sjúkrahússins á Akureyri frá árinu 2013. Úrtakið mun samanstanda af 10-12 íslenskum konum á barneignaraldri (18-39 ára) sem eru fjölbyrjur og voru í offitu (BMI ≥ 30 kg/m2) fyrir síðustu meðgöngu. Gögnum verður safnað með óstöðluðum djúpviðtölum þar sem stuðst verður við viðtalsramma. Tíðni offitu er jafnt og þétt að aukast um heim allan og er að verða að einu algengasta og alvarlegasta vandamáli heilbrigðiskerfisins. Heilbrigðisstarfsfólk verður ekki varhluta af þessu vandamáli þar sem sífellt fleiri notendur heilbrigðisþjónustunnar eru einstaklingar yfir kjörþyngd. Offita á meðgöngu er þessari þróun ekki undanskilin. Rannsóknir benda til þess að offita á meðgöngu sé að aukast og er það mat rannsakenda að viðhorf og þekking íslenskra kvenna á barneignaraldri til offitu sé ekki í samræmi við þær alvarlegu afleiðingar sem offitan getur haft í för með sér. Ljóst er að margar ófrískar konur stunda enga hreyfingu á meðgöngu eða dragi verulega úr henni og er því þörf á bættu viðhorfi ófrískra kvenna til hreyfingar. Engar íslenskar rannsóknir fundust við vinnslu verkefnisins um þekkingu og viðhorf íslenskra kvenna á barneignaraldri til offitu og hreyfingar á meðgöngu. Rannsakendur álykta að þörf sé á slíkri rannsókn til að auka þekkingu hjúkrunarfræðinga og annars heilbrigðisstarfsfólks svo hægt sé að vinna að breyttu viðhorfi og aukinni þekkingu meðal íslenskra kvenna. Lykilhugtök: Meðganga, offita, hreyfing, viðhorf, þekking, barneignaraldur, hjúkrunarfræði, ...