Innleiðing heildstæðs stuðnings við jákvæða hegðun í leikskólum: Áhrif á vinnubrögð starfsfólks og hegðun barna

• Main Author: Ingunn Brynja Einarsdóttir 1983-
• Other Authors: Háskóli Íslands
• Format: Thesis
• Language: Icelandic
• Published: 2012
• Subjects: Sálfræði; Atferlismótun; Leikskólabörn; Gerðar; Reykjavík
• Online Access: http://hdl.handle.net/1946/12194

Rannsóknin fólst í að athuga áhrif innleiðingar heildstæðs stuðnings við jákvæða hegðun (e. School-Wide positive behavior support – SW-PBS) á vinnubrögð leikskólastarfsfólks og hegðun leikskólabarna. Sjálfsmatskvarði og beinar áhorfsmælingar voru notaðar til að meta áhrif innleiðingar. Einnig var kannað samræmi á milli þessara tveggja matsaðferða. Rannsóknin fór fram í fimm leikskólum í Reykjavík. Samanburður var gerður á milli leikskóla sem eru að innleiða heildstæðan stuðning við jákvæða hegðun (tilraunahópur) og leikskóla sem eru ekki að innleiða heildstæðan stuðning við jákvæða hegðun (samanburðarhópur). Þátttakendur í tilraunahópnum voru 29 leikskólastarfsmenn og 185 börn af tveimur leikskólum. Þátttakendur í samanburðarhópnum voru 34 leikskólastarfsmenn og 227 börn af þremur leikskólum. Gerðar voru 2 mælingar á hvern starfsmann, annars vegar í samverustund og hins vegar í hádegismat í hvorum hópi fyrir sig, sem eru 126 tíu mínútna mælingar í heildina. Helstu niðurstöður sýndu tölfræðilega marktækan mun á milli hópa á eftirfarandi breytum: hunsun fyrir óæskilega hegðun, að reglur væru sýnilegar, notkun starfsfólks á áminningum um reglur til að fyrirbyggja óæskilega hegðun og útskýringum á mikilvægi reglna, meðferðarheldni og að þriggja liða styrkingarskilmála væri lokið á rangan hátt. Ekki mældist tölfræðilega marktækur munur á milli hópa á eftirfarandi breytum: skýrar væntingar um hegðun, jákvæð athygli, hrós og hunsun fyrir æskilega hegðun, neikvæð athygli og óheil athygli fyrir óæskilega hegðun. Einnig leiddi rannsóknin í ljós að meðferðarheldni var rúmlega 23% og lítið samræmi var á raunnotkun aðferða heildstæðs stuðnings við jákvæða hegðun og þeim aðferðum sem starfsfólk taldi sig nota. Lykilorð: Sálfræði, Atferlismótun, Leikskólar, Hegðunarvandamál, Heildstæður stuðningur við jákvæða hegðun, Samskipti, Starfsfólk