Summary: | Ofbeldisverknaður eins og manndráp er verknaður sem þykir eitthvert alvarlegasta afbrot sem hægt er að fremja í hinum vestræna heimi. Í þessari ritgerð er fjallað um bakgrunn gerenda í manndrápsmálum og horft til þess hvað það er sem fær einstaklinga til að fremja manndráp. Hvaða þættir séu líklegri en aðrir til að stuðla að því að einstaklingur svipti aðra manneskju lífi. Samfélagslegir og einstaklingsbundnir orsakaþættir eru skoðaðir og reynt að rýna í vægi hvors þáttar fyrir sig. Jafnframt verður litið á manndrápsmál á Íslandi og öðrum Norðurlöndum, tíðni þeirra og aðra verknaðarþætti, og auk þess kannað hvernig kenningar afbrotafræðinnar falla að veruleika manndrápsmála á norðurhveli jarðar. Helstu niðurstöður benda til þess að blanda samfélagslegra þátta eins og efnahagslegur skortur og félagsmótun annars vegar og hins vegar einstaklingsbundinna þátta eins og persónuleika, andlegt ástand, aldur og kyn hafi hvað mest áhrif þegar kemur að því að skoða bakgrunn einstaklinga sem framið hafa eða séu líklegri en aðrir til að fremja manndráp. Niðurstöður fyrir tíðni manndrápsmála á norðurslóðum benda til aukningar á sviðinu en þegar tölfræðin er skoðuð með tilliti til fólksfjölgunar er ekki hægt að halda því fram að um vaxandi vandamál sé að ræða.
|