| Summary: | Dát masterdutkamušas čielggada maid Suoma sámiid ruovttuguovllu álgooahpahusa sámegielat oahpaheaddjit jurddašit diehto- ja gulahallanteknologiija geavaheamis oahpahusas ja mo sii árvvoštallet iežaset digitála gelbbolašvuođaset. Dasa lassin dutkamuš buktá ovdan mot oahpaheaddjit vásihedje sirdáseami gáiddusoahpahussii Covid19-epidemiija geažil. Dutkanmateriála čoggui elektrovnnalaš jearahallanskoviin (N=6). Jearahallanskovis ledje guovttelágan vástádusvuogit: vuosttažin oahpaheaddjit válljejedje gárvves skálas molssaevttolaš vástádusa mii govvii sin dili buoremusat ja dasto sii čálle oaiviliid rabas vástádusbáikái. Go vástádusat ledje unnán, de dát kompenserejuvvui dainna ahte oahpaheddjiid kvalitatiivvalaš čállosat bukte čiekŋaleappot dieđuid oahpaheddjiid jurdagiin diehto- ja gulahallanteknologiija oahpahusgeavaheami birra. Dutkanmateriála analyserejuvvui teoriijastivrejeaddji sisdoalloanalyseremiin, mii vuođđuduvvá Mishra ja Koehlera (2009) teknologalaš pedagogalaš sisdoallodiehtomállii (TPACK). TPACK-málle dahká vejolažžan reflekteret oahpaheaddji digitálalaš gelbbolašvuođa ja dasa lassin ovddidit oahpahusa mii váldá digitála reaidduid ja birrasiid buoremus vugiin vuhtii. Bohtosat čájehit, ahte oahpaheaddjit geavahit unnán diehto- ja gulahallanteknologiija sámegielat álgooahpahusas. Dát boahtá bohtosiid vuođul das ahte oahpaheaddjit eai dovdda nu bures digitálačovdosiid mat heivešedje sámegielat oahpahussii. Oahpahusas leat eanáš geavahusas digitálalaš rusttegiin dihtorat. Dasa lassin oahpaheaddjit almmuhit ahte gártet geavahit máŋgii suomagielat digitálačovdosiid, go sámegillii leat unnán gávdnomis heivehusat, maid sáhtášii geavahit sámegielat álgooahpahusas. Dutkamuša vuođul lea dárbu fállat dievasmahttinskuvlejumi oahpaheddjiide diehto- ja gulahallanteknologiija 2 geavaheamis oahpahusas. Dasa lassin lea dárbu buvttadit lasi digitála čovdosiid sámegielat vuođđooahpahusa várás. This master’s thesis clears out what Finnish Sami primary school teachers thinks about information and communication technology ...
|
|---|